Wat glo Jean Oosthuizen?

Hy ontboesem oor sy geloof in ‘n onderhoud met Hanlie Retief.

Hy ontken die ekslusiewe aard van die Christelike geloof. Hy ontken die bestaan van die hemel en die hel.

Hoe op aarde kon iemand wat ons geloof so blatant verwerp ons kerk se amptelike nuusredakteur wees? Wie het hom in daardie pos aangestel en beskerm?

Lees hierdie artikel in Kerkbode: Sy eks-baas Pieter Fourie hang dieselfde dwaalleer aan.

En wat van Nelus Niemandt? Oosthuizen beweer in die onderhoud: “Vroeër die oggend het Nelus Niemandt, moderator van die NG Kerk, hom gebel met “waardering vir my en my werk”.”

Prof Niemandt, hoe kan mens iemand wat nie die Evangelie glo nie aanstel om die Evangelie te verkondig? (Is dit tog nie Kerkbode se primêre roeping nie?) Of het u nie ‘n probleem met Oosthuizen se teologie nie?

Hoe kan u ‘n wolf in skaapsklere se werk “waardeer”?

Prof Niemandt, u is die lidmate van u kerk ‘n dringende antwoord verskuldig! (Dis te sê as Oosthuizen nie lieg oor u oproep nie…)

Dank die Here hierdie dinge kom nou aan die lig.

In Jean Oosthuisen se eie woorde: 

Hy glimlag. “Baie mense het my al gevra. Op Kletskerk is gesê ek is te bang om te sê waarin ek glo.”

Wie is God?

“Dis die vraag, nè. Mense sê ook my definisie van God is wollerig. Maar hoe kan ek Hom in ’n kassie sit? God is vir my die Groot Misterie. Nie eens die belydenisskrifte gee my al die antwoorde oor God nie. Jy kan net ’n ervaring van God hê. En ek hét ’n Godservaring.”

En die hemel en die hel?

Hy gee ’n laggie. “Ja, die hemel en die hel, verál die hel.

“Joe. As ons glo in ’n God van liefde en genade, hoe sal Hy toelaat dat jy vir net 80 jaar op aarde leef en dan vir die res van die ewigheid in die helse vuur deurbring? Ek kan my nie met so ’n godsdiens vereenselwig nie. En die hemel? Ja… wat wéét ons wat ná die dood gebeur.”

En is daar net een God vir Christene, Moslems en Jode?

“Kyk, party mense dink ons geloof is ál regte een. Maar as ek in ’n Moslemland gebore is, was ek mos ook een.

“En ’n Jood in Israel. Wie gee mý die reg om te sê net my godsdiens is reg? Ek het God leer ken deur ­Jesus van Nasaret wie se volgeling ek is, wat rigting gee aan my lewe. Maar ek kan nie sê ’n Moslem is verkeerd nie, dis arrogant.”

Geloof is vir Jean intens persoonlik. “Dis maklik om te sê wat God nié is nie. Nié die omie met die wit baard wat als daar van bo af sit en reël nie. God is vir my hier op aarde, want as Hy nie tussen mense is nie, waar is Hy dan?”